UMZUKULU KAMHLANGANYELWA
Ukungezwani kwezepolitiki kushubile kulandela izinsolo zenhlangano iMarch and March zokuthi i-Economic Freedom Fighters (EFF) kanye nelungu layo, uSinawo Thambo, basebenzise inkomfa yakamuva ukuhlasela le nhlangano yize umcimbi ubungahlangene nayo ngqo.
Esitatimendeni esisabalaliswe ezinkundleni zokuxhumana, iMarch and March ithi abamele i-EFF bafake igama layo ezingxoxweni zenkomfa futhi bacela iqembu le-uMkhonto weSizwe (MK) ukuba lizihlukanise nayo.
Ngokusho kweMarch and March, abamele le nhlangano baphoqeleke ukuba baphendule emuva kwezinkulumo ezenziwe kule ngosi.
Le nhlangano iphinde yasola i-EFF ngokusabalalisa lokho ekuchaze njengenguqulo engeyona yeqiniso mayelana nokwenzeke kule nkundla.
“USinawo Thambo ne-EFF baya enkomfeni engenalutho oluhlobene neMarch and March, kodwa baqala ukuyifaka ezingxoxweni futhi bafuna iMK Party izihlukanise nathi,” kusho isitatimende.
Le nhlangano iveze ukukhathazeka ngokuthi i-EFF ibonakala iqhubeka nokuyihlasela, yabuza ukuthi kungani iqembu lezepolitiki lingachitha isikhathi namandla amaningi kangaka ligxile enhlanganweni engeyona ngisho iqembu lezepolitiki.
IMarch and March iphinde yasola i-EFF ngokudukisa umphakathi ngamabomu ngalokho okwenzeke enkomfeni, ithi kusatshalaliswa izindaba ezingelona iqiniso ngenhloso yokungcolisa igama layo.
Abahlaziyi bezepolitiki bathi ukuncintisana kwethonya phakathi kwamaqembu nezinhlangano ezahlukene kuyaqhubeka nokwanda, ikakhulukazi kulabo abafuna ukuheha ukwesekwa komphakathi ezindabeni zokubusa, uguquko kwezomnotho kanye nobuzwe.
Ngesikhathi kushicilelwa le ndaba, uSinawo Thambo noma i-EFF bebengakakhiphi impendulo esemthethweni mayelana nalezi zinsolo.
Leave a Reply