UMZUKULU KAMHLANGANYELWA
Usaziwayo kwezomsakazo nokusakaza ama-podcast, Sol Phenduka, ushiye abaningi bemangele embonini yezokungcebeleka ngemuva kokudalula ukuthi useqalile amalungiselelo okusungula i-podcast yakhe.
UPhenduka, owaziwa kakhulu ngokuba yingxenye ye-Podcast and Chill with MacG ehambisana no-Mac G, wenze lesi simemezelo ngesikhathi eyisimenywa ku-Amagents Podcast eyethulwa u-Penuel.
Lesi simemezelo sibonakale sishaqisa ngisho nomethuli wohlelo, uPenuel, obuze ukuthi ngabe abalandeli bePodcast and Chill, abaziwa ngokuthi “The Chillers,” bayazi yini ngalesi sinyathelo?
UPhenduka uphendule wathi lena yindawo yokuqala akhuluma khona ngalolu daba emphakathini.
“Cha, lena yindawo yokuqala ngikhuluma ngayo emphakathini, kodwa kade saqala ukuyisebenza le podcast futhi sizoyethula maduze,” kusho yena.
UPhenduka usezakhele igama ngenxa yokukhuluma kwakhe okungafihli lutho kanye nokubambisana kwakhe noMac G, okumenze waba ngomunye wamagama amakhulu emhlabeni wama-podcast eNingizimu Afrika.
Ukusebenza kwakhe ne-Kaya FM nako kumakhele igama ngaphambi kokuhamba kwakhe.
Ngaphandle kwezokusakaza, uPhenduka uphinde waveza ukuthi usengene nasebhizinisini lezindlu kanye nemicimbi, okukhombisa ukuthi ufuna ukwandisa amathuba akhe ngaphandle kwezokuxhumana.
Nakuba imininingwane nge-podcast entsha, okuhlanganisa uhlelo lwayo kanye nosuku lokwethulwa, ingakadalulwa ngokugcwele, kulindeleke ukuthi lesi sinyathelo sidonse amehlo abaningi, ikakhulukazi kubalandeli bakhe.
Lokhu kuphinde kuphakamise imibuzo ngokuthi lesi sinyathelo sizoyithinta kanjani indima yakhe kuPodcast and Chill, ehamba phambili kwezokuxhumana zedijithali eNingizimu Afrika.
Leave a Reply