Umsakazi weMetro FM, uDineo Ranaka, ushiye abaningi bemangele ngemuva kokubhaphathizwa eHighway Church eCenturion, njengoba izithombe zalo mcimbi zisabalale ezinkundleni zokuxhumana.
URanaka, osaqhubeka nokuba yingxenye yeMetro FM futhi ophethe uhlelo iMetro FM Top 30 njalo ngoMgqibelo ekuseni, ubonakale ejabule ngemuva kokubhaphathizwa kuleli bandla ngempelasonto.
Ukubhaphathizwa kwakhe sekudale umsindo omkhulu ngenxa yohambo lwakhe kwezokholo nobungoma.
URanaka wake waveza esidlangalaleni ukuthi wamukela ubizo lwamadlozi futhi waziwa nangokuthi uGogo Somahashe, ngemuva kokuthatha uhambo lokuba isangoma.
Manje abantu abaningi bayazibuza ukuthi ngabe lesi sinyathelo sokubhaphathizwa sisho ukuthi usephendule ikhasi empilweni yakhe yobungoma.
Ezinkundleni zokuxhumana sekunenkulumompikiswano enkulu mayelana nokuthi ukubhaphathizwa kwakhe kusho ukuthini, ikakhulukazi njengoba phambilini eke wakhuluma ngokusobala ngohambo lwakhe njengomelaphi wendabuko kanye nobudlelwano bakhe nezinto zokomoya.
I-Highway Church Centurion nayo isabalalise izithombe zalo mcimbi, kanti lezi zithombe zisabalale kakhulu ezinkundleni zokuxhumana, kwavuka imibuzo mayelana noshintsho olukhulu empilweni yakhe yokomoya.
Abanye abantu bayakwamukela lokhu, bethi ukubhaphathizwa kwakhe kuwuphawu lokuvuselela ubudlelwano bakhe noNkulunkulu.
Kodwa abanye bayabuza ukuthi lokhu kuhambisana kanjani nempilo yakhe yangaphambilini yokuba isangoma.
URanaka yena akakakhulumi kabanzi ngokuthi ukubhaphathizwa kwakhe kusho ukuthini ngempilo yakhe yobungoma.
Leave a Reply