Kube nenjabulo enkulu kanye nomuzwa wokubonga ezinkundleni zokuxhumana emuva kokuba umsakazi odumile woKhozi FM, Zimdollar, efake umbhalo oveze ukuthi ubhekene nomsebenzi omkhulu wokukhokhela ama-rent awu-25 kanye nokuholela abasebenzi abawu-146.
Nakuba amazwi akhe ebezwakala njengokukhala ngobunzima bokuphatha amabhizinisi amaningi, abantu abaningi bagcine bemncoma ngokudala amathuba emisebenzi amaningi, bethi lokhu kukhombisa ukuthi ngemuva komsakazi odumile kungase kube khona usomabhizinisi omkhulu osiza ukondla imindeni eminingi yaseNingizimu Afrika.
“Namhlanje kumele ngikhokhele ama-rent awu-25, ngiholele abasebenzi abawu-146. Mayeeeeeeeeh!!!”
Lokhu kushiye abaningi bemangele ngoba iningi labantu limazi njengomsakazi okhaliphile, hhayi njengosomabhizinisi ophethe inkampani ekwazi ukuqasha abantu abaningi kangaka.
Ngemva kokusabalala kwalowo mbhalo, izinkundla zokuxhumana zigcwale amazwi okuncoma nokumkhuthaza.
Omunye ubhale wathi:
“Awukhokheli abantu kuphela, wondla imindeni eminingi yaseNingizimu Afrika.”
Omunye wanezela ngokuthi:
“Uma umuntu eqasha abantu abangu-146, kusho ukuthi kunamakhulu abantu abaphila ngenxa yaleyo nkampani.”
Abanye baphawule ngokuthi osaziwayo abaningi bavame ukubonakala bekhuluma ngezimoto ezibizayo, izindlu zikanokusho noma impilo yobukhazikhazi, kodwa uZimdollar ukhombise ukuthi impumelelo ingasetshenziswa ukudala amathuba emisebenzi nokusiza umphakathi.
Lo msakazi uphinde wabonga uthando nezibusiso azitholile kubalandeli bakhe.
Uveze ukuthi uyakwazisa kakhulu ukwesekwa abantu abamkhombise kona ngesikhathi ebhekene nengcindezi yokuphatha amabhizinisi nokukhokhela abasebenzi.
Ochwepheshe bezamabhizinisi bathi ukuqasha abantu abangaphezu kuka-100 akuyona into encane, ikakhulukazi ngesikhathi lapho izinga lokungasebenzi eNingizimu Afrika lisalokhu liphezulu.
Leave a Reply