Kugcwele usizi embonini yezokungcebeleka eNingizimu Afrika kulandela izindaba zokudlula emhlabeni komlingisi, umculi nomdansi obeyintandokazi kubathandi bezobuciko, uThemb’nkosi Phillip Mfana Jones Hlophe.
UHlophe, obaziwa kakhulu ngelikaMfana Jones Hlophe, udlule emhlabeni ngoLwesithathu, mhla ziyisi-7 kuMfumfu wezi-2026, eneminyaka engu-55 ubudala, ngemuva kokulwa nesifo sikashukela sohlobo lokuqala (Type 1 diabetes).
Lezi zindaba ziqinisekiswe yimindeni yakwaHlophe nakwaMsabala esitatimendeni esisemthethweni, zashiya abalandeli kanye nozakwabo embonini yezokungcebeleka bedangele.
UHlophe ubengomunye wabaculi nabalingisi abebaziwa ngokukwazi ukulingisa, ukucula nokudansa.
Uke wabonakala ezinhlelweni eziningi zikamabonakude ezithandwa yizibukeli zaseNingizimu Afrika, okubalwa kuzo Uzalo, Generations, Soul City kanye neThe Legacy.
Uphinde waba yingxenye yemidlalo yasesiteji eseyaduma kakhulu, okubalwa kuyo iSarafina! kanye ne-Ipi Ntombi.
Ikhono lakhe kwezobuciko lamvulela namathuba okubonakala emhlabeni jikelele. Wathola indondo yeBest Documentary eCameroon, waphinde waqokwa emkhakheni weBest Supporting Actor kumaSabela Awards.
Ukudlala kwakhe emidlalweni ehlukene kwamakhela igama embonini yezokulingisa, kwamenza waziwa nayizibukeli ebezilokhu zimlandela kumabonakude.
Ukushona kwakhe kushiya igebe kubathandi bezobuciko nakulabo abake basebenza naye emidlalweni yasesiteji nakumabonakude.
Umndeni usuveze ukuthi inkonzo yesikhumbuzo izoba seGoli, kodwa usuku nendawo okuzobanjelwa kuyo akukakamenyezelwa.
Inkonzo yomngcwabo izoba seMlazi, eThekwini, ngoMgqibelo, mhla ziyi-17 kuMfumfu wezi-2026.
Njengoba izindaba zokudlula kwakhe emhlabeni zisabalele, umyalezo womndeni ukhumbuza abantu ngokubaluleka kwefa elishiywa ngumuntu ozinikele kwezobuciko.
“A true actor lives forever in the hearts of those who feel his story,” kusho umndeni, ugcizelela ukuthi umlingisi weqiniso uyaqhubeka ephila ezinhliziyweni zalabo abathintwe umsebenzi wakhe.
UMfana Jones Hlophe uzokhunjulwa ngeqhaza lakhe ekuthuthukiseni ezobuciko, nangamakhono akhe okulingisa, ukucula nokudansa awakhombisa kubabukeli baseNingizimu Afrika.
Leave a Reply