Umsakazi nentatheli ye-SABC News, uHeidi Giokos, uzithole esegxekwa kanzima ezinkundleni zokuxhumana kulandela ukubika ngesimo sesiphithiphithi kanye nezigameko zokuphanga izitolo eThekwini, KwaZulu-Natal.
Ngesikhathi kusakazwa izithombe zesimo esishubile, abanye ababukeli bazwakalise ukungenami ngendlela okubikwa ngayo.
Abanye basole lo msakazi ngokuthi usheshe wafinyelela esiphethweni sokuthi abantu bebezama ukuphanga izitolo, bethi ubengaziboni mathupha lezo zenzo.
Nokho, impikiswano ayigcinanga ngokugxekwa kombiko wezindaba.
Ngokushesha, inkundla yezokuxhumana u-X igcwale imiyalezo ehlasela uGiokos.
Omunye umsebenzisi umthuke ngenhlamba eshaqisayo, emsola ngokubika ngokuthi abantu bebezama ukuphanga izitolo engazange abe khona mathupha endaweni yesigameko.
Abanye baze bafaka nodaba lobuhlanga kule mpikiswano, kwathi abanye bagxeka indlela abika ngayo.
Eminye imiyalezo ibiqukethe amazwi asabisayo kanye nokufisela izintatheli ukubhekana nodlame.
UGiokos akazange athule ebhekene nalokhu kuhlaselwa. Uphendule ngokugcizelela ukuthi abantu bangaphikisana ngemibono, kodwa lokho akumele kube yisizathu sokuthuka nokusabisa izintatheli.
“Singangavumelani ngezinto eziningi empilweni, kodwa ukusabalalisa inzondo nokugqugquzela udlame olubhekiswe ezintathelini akusizi muntu!” kusho yena.
Lesi sigameko siphinde savusa inkulumompikiswano ngokuvikeleka kwezintatheli ezibika ngezimo ezishubile, ikakhulukazi uma imibiko yazo ingahambisani nemibono yomphakathi.
Leave a Reply