Abalandeli bomculo eThekwini bathole isimanga ngomzuzu wokugcina ngemva kokuba abahleli bememezele ukuthi ikhonsathi ebilindelwe ngabomvu kaTamia ngeke isabanjelwa eDurban ICC.
Esazisweni esikhishwe ngaphambi komcimbi, abahleli baqinisekise ukuthi iTamia Live in Durban isithuthelwe e Hollywoodbets Kingsmead Stadium eStamford Hill.
Ikhonsathi isazoqhubeka ngoLwesihlanu, mhla ka-7 Agasti 2026.
Ngokwesaziso, usuku lomcimbi alushintshile, kanti wonke amathikithi ayethengelwe iDurban ICC azosebenza endaweni entsha.
Abanikazi bamathikithi bazothola amathikithi amasha aseHollywoodbets Kingsmead Stadium, kanti izihlalo zabo zizohlelwa kabusha ngokwezihlalo ezingcono kakhulu ezisatholakala.
Lolu shintsho oluphuthumayo ludale imibono ehlukene kubathandi bomculo, njengoba abanye besamukele indawo enkulu entsha, kuyilapho abanye bekhathazekile ngokuhlelwa kwezihlalo kanye nesikhathi esifushane sokwaziswa.
UTamia, ongumculi we-R&B oqokwe kumaGrammy futhi owaziwa ngezingoma ezifana no “So Into You,” “Officially Missing You,” kanye no “Stranger in My House,” kulindeleke ukuthi ahehe izinkulungwane zabalandeli abavela kuzo zonke izingxenye zaKwaZulu-Natal na ngaphandle kwesifundazwe.
Abahleli baxolisile nganoma yikuphi ukuphazamiseka okubangelwe yilolu shintsho futhi bathi babheke ngabomvu ukuletha “ubusuku obungeke bulibaleke noTamia.”
Lekhonsathi eThekwini ibhekwe njengenye yemicimbi emikhulu ye-R&B yamazwe omhlaba elindelwe kakhulu kuleli dolobha, kanti abalandeli manje balindele imininingwane eyengeziwe mayelana nokwabiwa kabusha kwamathikithi kanye nokuhleleka kwendawo entsha.
Leave a Reply