UMZUKULU KAMHLANGANYELWA
Umsakazi weGagasi FM, uHeazy Madida, uphakathi kwezinkulungwane zabagijimi ababambe iqhaza kwiComrades Marathon ka-2026, njengoba amehlo ezwe nawomhlaba ebheke kulolu mjaho oludume umhlaba wonke olugubha unyaka wawo wama-99.
UMadida ubelokhu ebuyekeza abalandeli bakhe ngohambo lwakhe lweComrades, ekhombisa ukuzimisela namandla njengoba ebhekene nomunye wemijaho yokukhuthazela enzima kakhulu emhlabeni.
Lo msakazi odumile ubesaqhubeka nokugijima ngamandla emzileni womjaho njengoba abagijimi beqhubeka nohambo lwabo phakathi kweTheku neMgungundlovu, besekelwa yizinkulungwane zabalandeli ezimi eceleni komgwaqo zibakhuthaza.
IComrades Marathon ibhekwa njengomjaho omdala kunayo yonke futhi omkhulu kunayo yonke emhlabeni emkhakheni wama-ultramarathon. Minyaka yonke iheha izinkulungwane zabagijimi abavela eNingizimu Afrika nakwamanye amazwe. Lo mjaho waziwa ngomlando wawo ocebile kanye nomoya wokubekezela, ubumbano nokunqoba izinselelo.
KuMadida, ukubamba iqhaza kulolu hambo olunzima kuwubufakazi bezinyanga zokuzilungiselela, ukuzinikela nokusebenza kanzima. Ukugijima kwakhe kuphinde kwagqugquzela abaningi kubalandeli bakhe, njengoba abasebenzisi bezinkundla zokuxhumana beqhubeka nokumthumelela imiyalezo yokumeseka nokumfisela impumelelo.
Njengoba umjaho uqhubeka, amehlo amaningi asalokhu ebheke kuHeazy Madida nakwezinye izinkulungwane zabagijimi abazama ukufinyelela entanjeni yokugcina kulo mjaho ohlonishwayo.
“Qhubeka Heazy, usuyisondele!” yilo myalezo oqhubeka uzwakala kubalandeli abaningi njengoba lo msakazi weGagasi FM eqhubeka nokuphakamisa ifulegi lesiteshi sakhe komunye wemicimbi yezemidlalo emikhulu eNingizimu Afrika.
Leave a Reply