UMZUKULU KAMHLANGANYELWA
Umsakazi wohlelo lwasekuseni kuKaya 959, uDJ Fresh, useveze imfihlo ehlekisayo ngokuvuma ukuthi wacishe wazichamela ngesikhathi ebona iPhini likaMengameli weqembu uMkhonto weSizwe (MK Party), uTony Yengeni, okokuqala ngemuva kokuhlekisa ngaye emsakazweni.
UFresh uthe ngesikhathi esasebenza ku-5FM, yena nozakwabo babevame ukwenza izinhlelo ezihlekisa ngosopolitiki, okuhlanganisa namahlaya namasikithi aphawula ngezindaba zombusazwe.
Uthe ngelinye ilanga benza ihlaya ngoYengeni, laduma kakhulu ezinkundleni zokuxhumana laze lafika nakuYengeni uqobo.
UFresh uthe ngesikhathi i-5FM inomcimbi eKapa, kwafika noYengeni. Uthe ngesikhathi embona nje, wethuka kakhulu ngoba wayecabanga ukuthi uzobhekana nolaka lwakhe.
“Ngacishe ngazichamela ngesikhathi ngimbona. Bengilindele ukuthi sizolwa,” kusho uFresh.
Kodwa izinto zagcina zihambe ngendlela ayengayilindele.
Uthe uYengeni wasondela kuye emamatheka, wabe esethi: “Niyizigebengu nina bafana.” Bobabili bagcina behleka ngalelo hlaya.
“Weza kimi wathi, ‘Niyizigebengu nina bafana.’ Sahleka ngalelo hlaya, kodwa kufanele ngivume ukuthi ngesikhathi ngimbona ngangethuke kakhulu,” kusho uFresh.
Indaba kaDJ Fresh ishiye abaningi behleka, kanti abaningi bathi kuyajabulisa ukubona ukuthi amahlaya angagcina ephenduke umzuzu wokuhleka kunokuba adale ingxabano.
Leave a Reply