Imboni yezokusakaza eNingizimu Afrika ibhekene nolunye ushintsho olukhulu kulandela ukuhlukana kosomabhizinisi, uThabile Ngwato noThokozani Nkosi,
Laba bahlukene ngemuva kweminyaka bakha ishaneli yezindaba nezokungcebeleka azimele kuleli.
Laba bobabili sebahlukene ngobunikazi be-Ngwato Nkosi Group, inkampani yezindaba nezokusakaza ebiphethe iziteshi okubalwa kuzo i-Newzroom Afrika, PlayRoom neMovieRoom.
Ngaphansi kwesakhiwo esisha, uThabile Ngwato ugcina ubunikazi beNewzroom Afrika, isiteshi sezindaba esisakaza amahora angu-24 esesizakhele igama elikhulu emkhakheni wezindaba zethelevishini eNingizimu Afrika.
Khonamanjalo, uThokozani Nkosi usungule inkampani entsha ebizwa nge-The Rooms Network, ezoba ngumnikazi we-PlayRoom neMovieRoom.
Lokhu kuhlukana kuvala isahluko sobambiswano lwezamabhizinisi olwaqala ngo-2018, ngesikhathi laba bobabili besungula inkampani eyayibhaliswe ekuqaleni njenge-Ngwato Nkosi Holdings.
Uhambo lwabo lwadonsa amehlo ezweni lonke ngesikhathi le nkampani iphumelela emncintiswaneni wokuthola indawo yesiteshi sezindaba eyayishiywe Africa News Network 7 (ANN7)
Lokhu kwaholela ekusungulweni kwe-Newzroom Afrika ngo-2019, eyasheshe yaba ngamanye amagama aziwayo emkhakheni wezindaba zethelevishini kuleli.
Enye yezinto ezibalulekile ezenzekile ngaphansi kwalesi sakhiwo esisha ukutholwa kwamalungelo okusakaza kumabonakude uhlelo luka-Chris Q. Radebe, oluzixhase ngemali, Shut Up Men Are Talking.
Ukuthengwa kwala malungelo kwenziwa ngaphansi kwe-The Rooms Network, inkampani ephethwe nguNkosi.
Lokhu kukhombisa ukuthi le nkampani entsha ihlela ukwakha ubukhona bayo emkhakheni wezokuzijabulisa ngokudlulela ngale kwemikhiqizo eyayivele ingaphansi kweqembu langaphambilini.
Leave a Reply