Umsakazi weGagasi FM, uNonjabulo “Njaps” Zwane, usekhulume ngesigameko esenzeke ezinkundleni zokuxhumana esamphatha kabi, savusa nemibuzo ngokuthi kufanele anikeze abantu abangakanani ithuba lokungena empilweni yakhe yangasese.
UNjaps ukhulume ngale ndaba ohlelweni lwe-podcast i-Engineer Your Life, olusakazwa nguLungelo KM.
UNjaps washonelwa ngumama wakhe ngo-2022. Muva nje uvakashele ithuna likanina, wathatha isithombe setshe lethuna walifaka ezinkundleni zokuxhumana, ehambisana nomlayezo oveza ukuthi uyamkhumbula.
Kodwa esikhundleni sokuthola amazwi enduduzo, omunye umuntu waphendula ngokubuza nge-tshe lethuna, efuna ukwazi ukuthi uyithole kuphi “tombstone plug”.
Le nkulumo yamphatha kabi kakhulu uNjaps ngoba lo muntu wayebukeka engayinaki nhlobo ingqikithi yesithombe kanye nemizwa eyayihambisana naso.
UNjaps uthe lo muntu wayengaboni ukuthi ubebhala ngesikhumbuzo sikamama wakhe futhi eveza ubuhlungu bokumkhumbula.
Umsakazi uthe lesi sigameko simkhumbuze ukuthi abantu kwesinye isikhathi bayehluleka ukuhlukanisa phakathi kwamahlaya nezinkulumo ezivamile ezinkundleni zokuxhumana kanye nemizwa yangempela yabantu.
Uthe abantu kufanele baqonde ukuthi ngemuva kwesikrini kukhona umuntu onemizwa, ikakhulukazi uma ekhetha ukwabelana nabanye ngento emenza abe sengozini ngokomzwelo.
UNjaps uthe lesi sigameko samenza wazibuza ukuthi mhlawumbe ubesenza iphutha ngokuvulela abantu kakhulu impilo yakhe yangasese.
Uthe yingakho esecabanga ukubeka imingcele eqinile ezinkundleni zokuxhumana, okuhlanganisa nokuvala ama-DM ukuze anciphise ukufinyelela kwabantu kuye.
Uthe akasazizwa enamahloni ngokunciphisa ukufinyelela kwabantu kuye, ngoba isinqumo esinjengalesi asithathwa ngosuku olulodwa.
Leave a Reply