Umsakazi osewumakadebona eNingizimu Afrika, uKgomotso KG Moeketsi, usephefumule okokuqala selokhu kwaphela inkontileka yakhe ne-SAFM, esola i-SABC ngokungalandeli inqubo efanele, esobala futhi enobulungiswa.
Esitatimendeni esikhishwe ngomhlaka 5 Agasti 2026, uMoeketsi uthi inkontileka yakhe yaqedwa kulandela uphenyo lwangaphakathi olwaluholwa yiMenenja entsha yeziNhlelo e-SAFM, uFerdinand Mabalane.
Lo msakazi, osechithe cishe iminyaka engu-30 emsakazweni, uthi manje useqongelela izimali ukuze ayise lolu daba eNkantolo eNkulu ngoba ekholelwa ukuthi amalungelo akhe njengosonkontileka azange ahlonishwe.
UKG uthi indaba yaqala ngomlaleli ahilizisana naye emoyeni ngenxa ye-Voice Note.
“Kungani ungazidlaleli yona wena?”
Uthi lo mlaleli wakuthatha kabi lokho, wabe esethumela neminye imiyalezo ehlambalazayo esebenzisa enye inombolo, kodwa yena wakhetha ukungaphenduli.
Nokho, uMoeketsi uthi lolu daba lwakhuliswa kakhulu ngesikhathi kunenkinga enkulu kakhulu eyayidinga ukunakwa.
Uthi ngomhlaka 31 Meyi 2026, cishe imizuzu engu-40 ngemuva kokuqala kohlelo lwakhe, i-SAFM yabhekana nokwehluleka okuphelele kwezobuchwepheshe, okwaphoqa i-Main Control ukuthi ithathe ukusakaza cishe amahora amabili ngesikhathi onjiniyela bezama ukulungisa inkinga.
UMoeketsi uthi lokhu kwamkhathaza kakhulu ngoba le nkinga yathinta abalaleli, abaxhasi kanye nabakhangisi, kodwa ngokombono wakhe abaphathi bagxila kakhulu esikhalweni se-WhatsApp kunasekwehlulekeni kwesiteshi uqobo.
Ezinsukwini ezimbalwa, wamiswa emsebenzini.
Lo msakazi uthi wathola kuphela ukuthi umisiwe ngesikhathi efika esiteshini ngomhlaka 6 Juni, lapho athola khona ukuthi omunye umsakazi wayesehleliwe ukuthi angene esikhundleni sakhe.
Kamuva wanikezwa incwadi yamacala futhi wathumela impendulo yakhe ngesikhathi esibekiwe.
UMoeketsi uphinde asole ngokuthi:
akazange anikezwe incazelo ecacile ngezinsolo ezengeziwe ezazisaphenywa;
wayesayine inkontileka yeminyaka emibili eyaqala ukusebenza ngomhlaka 1 Ephreli 2026;
inkokhelo yohlelo ayeselusakazile ngomhlaka 6 Juni yagodlwa yize kukhona ubufakazi bomsindo obuqinisekisa ukuthi uhlelo lwasakazwa.
Esitatimendeni sakhe, uphikise ngokuqinile isinqumo sokuthi wephule inkontileka, wathi okukhulu okumkhathazayo akukhona nje ukulahlekelwa umsebenzi, kodwa ukuthi ngabe inqubo eyalandelwa yayihambisana yini nezivikelo zenkontileka ezavunyelwana yizinhlangothi zombili.
UMoeketsi uveze ukuthi manje useqongelela izimali ukuze ayise lolu daba eNkantolo eNkulu, eluchaza njengempi enkulu yokuvikela amalungelo abasebenzi abazimele nabasakazi abasebenza ngezinkontileka embonini yezokusakaza.
Uthe abasakazi abaningi sebevele bamxoxele ngasese ukuthi bake babhekana nokuphathwa okufanayo kodwa bengenazo izinsiza zokulwa nakho.
“Osonkontileka abazimele bavame ukuba nezivikelo ezimbalwa kanye nezindlela ezimbalwa zokuthola ubulungiswa. Abaningi bayazihoxisa ngoba bengakwazi ukukhokhela impi yezomthetho. Mina nginqume ukuthi ngeke ngikwenze lokho,” kubhala yena.
Lo msakazi osewumakadebona ugcizelele ukuthi akafuni ukubuyiselwa umsebenzi wakhe, kodwa ufuna ukuziphendulela kwabaphethe, ukuhlolwa okuzimele kokuthi imigomo yenkontileka yakhe yahlonishwa yini, nokuthi izinyathelo ezathathwa ngakuye zazifanele yini.
Lomsakazi uphinde wadalula usola ukuthi uMabalane ubevele esambambele igqgubu, uthi ngesikhathi efika eSA FM , lomphathi wamkhomba ngenjumbane ukuthi waba imbangela yokuxoshwa kwakhe eKaya FM.
Leave a Reply