UMZUKULU KAMHLANGANYELWA
I-African National Congress Youth League (ANCYL) KwaZulu-Natal isimemezele uchungechunge lwemibuthano yokubukela imidlalo yeNdebe yoMhlaba ye-FIFA ka-2026 ezindaweni ezahlukene esifundazweni ngaphambi komdlalo wokuvula weBafana Bafana.
IBafana Bafana izoqala umkhankaso wayo ngokubhekana nezwe elingomunye wabasingathi balo mqhudelwano, iMexico, emdlalweni weQoqo A ozodlalelwa e-Estadio Azteca eMexico City ngo-21:00 (SAST) ngoLwesine, mhla ziyi-11 kuNhlangulana 2026.
Le nhlangano yentsha inxuse intsha yaKwaZulu-Natal ukuba ihlangane ndawonye isekele iqembu lesizwe.
“Sinxenxa bonke abasha baseKwaZulu-Natal ukuba sihlangane ndawonye njengesizwe esisodwa sisekele iBafana Bafana yethu. Lona ngumzuzu obalulekile emlandweni wezwe lethu futhi sifuna wonke umuntu omusha azizwe eyingxenye yalo mcimbi omkhulu,” kusho isitatimende se-ANCYL.
Ukuze bonke abalandeli bakwazi ukubamba iqhaza, i-ANCYL KZN ikhethe izindawo ezisemthethweni zokubukela umdlalo. Lezi zindawo zihlanganisa iLa Villa Cafe Lounge eThekwini, iKhethelo Car Wash eDukuduku, iKasifield Experience, i-Albert Park eThekwini CBD, i-Sanibonani Lounge kanye nase-Emamba Carwash & Shisanyama/Dano’s Carwash. Amasango azovulwa phakathi kuka-16:00 no-18:00 kuye ngendawo.
Lo mqhudelwano uphawula ukubuyela kweBafana Bafana kwiNdebe yoMhlaba ye-FIFA okokuqala kusukela iNingizimu Afrika yaba abasingathi bomqhudelwano ngo-2010.
Ngokusho kwe-ANCYL KZN, le mibuthano ihlose ukukhuthaza ubumbano, uthando lwezwe, ukubamba iqhaza kwentsha kanye nokweseka amabhizinisi endawo, ngesikhathi kwakhiwa izindawo eziphephile zokuthi abalandeli bebhola bajabulele lo mcimbi ndawonye.
Yonke le micimbi imahhala, kanti abalandeli bayakhuthazwa ukuba bagqoke imibala yesizwe.
Leave a Reply