UMZUKULU KAMHLANGANYELWA
INkantolo kaMantshi yaseGoli izwe izinsolo ezibucayi zokuthi umsolwa futhi okusolwa ukuthi , uBrown Mogotsi, ubelokhu exhumana nofakazi bombuso ngesikhathi esejele.
Ngesikhathi kuqhubeka ukuqulwa kwecala ngoMsombuluko, iphoyisa eliphenyayo lifakaze ukuthi uMogotsi kusolwa ukuthi uxhumane nabanye bofakazi abathintekayo kuleli cala.
Leli phoyisa litshele inkantolo ukuthi omunye wofakazi uzizwe esatshiswa futhi ecindezelwa ngemuva kokuxhumana noMogotsi, nokuholele ekutheni avule icala lobugebengu.
Lezi zinsolo ezintsha zivele ngesikhathi uMogotsi eqhubeka nomzamo wakhe wokuthola ibheyili.
Lo somabhizinisi waseNorth West usaqhubeka nokuboshwa ngemuva kokuthi inkantolo ike yanqaba ukumkhulula ngebheyili.
Abashushisi baphikise isicelo bethi ukukhululwa kwakhe kungaphazamisa uphenyo oluqhubekayo futhi kube nomthelela kofakazi ababalulekile kuleli cala.
UMogotsi ubhekene namacala amaningi abucayi okubalwa kuwo ukuqamba amanga ngaphansi kwesifungo, ukuvimbela ukusebenza kobulungiswa, ukutholakala nesibhamu nezinhlamvu ngokungemthetho, kanye nokudubula endaweni yomphakathi.
Kusolwa ukuthi wahlela umzamo wokuzibulala eVosloorus ngaphambi kokuthi anikeze amaphoyisa ulwazi okuthiwa lwalungelona iqiniso. Nokho, uMogotsi uyaziphika zonke lezi zinsolo.
Leli cala selidonse amehlo ezweni lonke ngenxa yobudlelwano bakhe nezepolitiki kanye nokuvela kwakhe phambi kweKhomishini kaMadlanga.
Abashushisi baphinde basola ngokuthi wake wazama ukuthonya iphoyisa eliphenyayo futhi wehluleka ukunikeza ikheli eliqinisekisiwe ngesikhathi kuqulwa isicelo sakhe sokuqala sebheyili.
Inkantolo kulindeleke ukuthi iqhubeke nokulalela izimpikiswano mayelana nesicelo sakhe sakamuva sebheyili, ngesikhathi uphenyo ngezinsolo zokwesabisa ofakazi nalo luqhubeka.
Icala lihlehliselwe olunye usuku ukuze kuqhubeke izinqubo zenkantolo.
Leave a Reply