UMZUKULU KAMHLANGANYELWA
OwayenguMengameli waseNingizimu Afrika, uJacob Zuma, uvakashele eNdiya lapho ehlangane khona nosomabhizinisi u-Ajay Gupta, amchaze njengomfowabo nomngani wakhe omkhulu.
Ekhuluma ngalolu hambo, uZuma uthe ukujabulele kakhulu ukuphinde abonane noGupta.
Uthe baningi abantu eNingizimu Afrika ababengakujabuleli ukusebenza kwabo ndawonye ngesikhathi esengumengameli, kodwa lokho akuzange kubuqede ubungani babo.
UZuma uphinde waveza ukuthi ngesikhathi eseNdiya uyiswe kumuntu amchaze ngokuthi “Man of God”.
Uthe unethemba lokuthi lo mholi wezenkolo uzomkhulekela ukuze iqembu lakhe liphumelele futhi likwazi ukunqoba ukhetho oluzayo eNingizimu Afrika.
Le nkulumo idale umsindo ezinkundleni zokuxhumana. Abanye abasebenzisi bahlekise ngalolu hambo, bethi uZuma uhambe wayofuna indlela yokuwina ukhetho.
Nokho, le mibono ivele kubasebenzisi bezinkundla zokuxhumana futhi ayisekelwa ubufakazi bokuthi yilokho obekuyinjongo yangempela yohambo lwakhe.
Ukuvakasha kukaZuma eNdiya kuqhubeka kudonsa amehlo njengoba ubudlelwano bakhe nomndeni wakwaGupta buhlala buyindaba eshisa izikhotha kwezombusazwe zaseNingizimu Afrika.
Dumisani Dlulisa
Thanks for your good update.