USindisiwe (Sindy) Nsele usehoxise izinsolo abezisabalalisa ezinkundleni zokuxhumana ezithinta umculi we-gospel uMdumiseni Nzimande, odume ngelikaDumi Mkokstad, waphinde waxolisa kuye nakumkakhe.
Esitatimendeni esisayinwe mhla zingama-23 kuMfumfu 2026, uNsele uvumile ukuthi izinto abezishicilela nezindlela abezethula ngazo zakha indaba engelona iqiniso nedukisayo ngomculi.
UNsele uphinde wacacisa ukuthi yena noDumi Mkokstad abakaze babe nobudlelwano bothando, obocansi noma obunye ubudlelwano bomuntu siqu obufana nalobo obebusikiselwa yizinsolo zakhe.
Uthe izingxoxo nezithombe-skrini abezisabalalisa nge-akhawunti yomgunyathi yeTikTok azizange ziveze amaqiniso ngendlela efanele, okwaholela ekutheni kusabalale indaba edukisayo ngomculi.
UNsele uvumile ukuthi izenzo zakhe zidale ukuhlukumezeka nokuphoxeka, zaphinde zalimaza umshado kaDumi, umndeni wakhe, ibhizinisi lakhe, inkonzo yakhe yobuKristu kanye negama lakhe emphakathini.
Ucele uxolo olusuka enhliziyweni kuDumi Mkokstad, kumkakhe, emndenini wakhe nakubo bonke abathintekile, wathi uyazisola ngesenzo sakhe.
Uphinde wahoxisa zonke izinsolo abezisabalalisile, wathembisa ukuthi ngeke aphinde aziphindaphinde noma azisabalalise.
Lesi sitatimende siza ngemuva kwezingxabano ezidalwe yizinsolo ebezisabalele ezinkundleni zokuxhumana, ezithinte impilo yangasese yomculi nomshado wakhe.
Leave a Reply