UMZUKULU KAMHLANGANYELWA
Usaziwayo ophinde abe yi-Content Creator uMandisi Ntshingana uthi uzizwe ehlazekile futhi ephathwe ngendlela engenabuntu ngesikhathi evakashele isiteshi samaphoyisa eManzimtoti ngenhloso yokuthola usizo olujwayelekile.
NgokukaNtshingana, lesi sigameko senzeke ekuseni ngesikhathi eya esiteshini samaphoyisa saseDurban South ukuze aqinisekise ikhophi kamazisi wakhe futhi enze i-afidavithi abeyicelwe yibhange lakhe.
Uthi ufike wajoyina ulayini njengabanye abantu ababefuna usizo, waze wabizwa phambili yiphoyisa lesifazane.
“Ngisondela ngithi nje, ‘Good morning,’ kodwa esikhundleni sokubingelela, wathi, ‘Ey ey awungimele no chappies!’ ngoba bengihlafuna ushungamu,” kusho uNtshingana.
Uthi leyo yindlela aqale ngayo ukubona ukuthi isimo sokusebenza besingakhombisi ubungcweti obulindelekile kumuntu osebenzela umphakathi.
UNtshingana uthi iphoyisa limcelale ukuthi achaze usizo aludingayo, walicela ukuthi liqinisekise ikhophi kamazisi wakhe.
Ukhala ngokuthi leli phoyisa liqinisekise ikhophi ngaphandle kokubheka umqulu wokuqala, labe seliyibeka eceleni lahamba ngaphandle kokukhuluma naye.
Uthi waphuma waya emotweni yakhe esamangazwe yindlela aphathwe ngayo, kodwa kamuva wakhumbula ukuthi kusamele enze i-afidavithi, kwaphoqa ukuthi abuyele ngaphakathi esiteshini.
Lapho ebuyela khona, uthi iphoyisa elifanayo belikhuluma ngokuzwakalayo nabanye ozakwabo ngokuthi liyabazonda abantu abahlafuna ushungamu futhi liyacasulwa yilokho.
“Ubexoxa ngami njengomuntu osezofuna usizo, abantu bonke bezwa. Lokho kudala indawo eyesabisayo nengafanele emphakathini,” kusho yena.
UNtshingana uthi ukhethe ukungaphenduli futhi waqhubeka ngokuthula egcwalisa i-afidavithi yakhe.
Ngemuva kokuyiqeda, uthi uye kwelinye iphoyisa, kulokhu elowesilisa, ukuze lisayine lo mbhalo. Kodwa uthi nalo alizange limsize ngokushesha.
“Lingibingelele ngokuthi, ‘Indlela ohlafuna ngayo ngathi usicuphile.’”
UNtshingana uthi uliphendula ngokubuza ukuthi ubacuphe kanjani, kwathi leli phoyisa lathi, “Cha phela usibangela umsindo.”
Uthi wabe esetshela iphoyisa ukuthi kukhona indlela enesizotha nenobungcweti yokukhuluma namalungu omphakathi.
“Ukugqoka umfaniswano wakwaSAPS akusho ukuthi umuntu akasaphoqelekile ukuphatha abantu ngenhlonipho nesithunzi,” kusho yena.
NgokukaNtshingana, ngesikhathi kubonakala ukuthi ngeke akwamukele ukukhulunyiswa ngaleyo ndlela, iphoyisa lizame ukuvala ingxabano ngokuthi, “Ok, asiyeke.”
Uthi ngaleso sikhathi ubesaqhubeka ehlafuna ushungamu, kanti iphoyisa lesifazane lalisakhuluma ngemuva limsola futhi lisho ukuthi liyenyanya abantu abahlafuna ushungamu.
UNtshingana ugcizelele ukuthi udaba alukho ngoshingamu uqobo, kodwa indlela akhulunyiswe futhi aphathwe ngayo.
“Uma kukhona okungahambi kahle, kungakhulunywa kahle nangobungcweti. Amalungu omphakathi akufanele ahlazwe, axoxwe phambi kwabanye noma esatshiswe lapho efuna izinsiza ezisemqoka,” kusho yena.
Uphinde waveza ukuthi uthathe isithombe sephoyisa alisolayo futhi usefake isikhalo esisemthethweni kwaSAPS mayelana nalesi sigameko.
Leave a Reply