UMZUKULU KAMHLANGANYELWA
Elinye lamabhusha aziwa kakhulu eMlazi kanye nakwaDukuza selingene esigabeni esisha ngemuva kokuziqamba kabusha.
Lelibhusha ebelaziwa ngegama elithi KwaMdladla Butchery selisebenza ngaphansi kwegama elisha elithi Izwelethu Retail, Butcheries & Restaurants, okuyisinyathelo esikhombisa ukukhula kwebhizinisi lisuka ekubeni yibhutsha kuphela liye nasezitolo zokudayisa kanye nezindawo zokudlela.
Leli bhizinisi lithi amakhasimende azoqhubeka nokuthola inyama esezingeni eliphezulu, kanti manje selizophinde linikeze imikhiqizo ehlukahlukene yokudayisa kanye nokudla okuphekwa ezindaweni zalo zokudlela.
Limemezela lolu shintsho, i-Izwelethu ithe izoqhubeka nokuzibophezela ekunikezeni imiphakathi inyama yekhwalithi ephezulu, imikhiqizo emisha, ukudla okumnandi kanye nenkonzo esezingeni eliphezulu.
Leli bhizinisi lisaqhubeka nokusebenza emagatsheni alo amabili KwaZulu-Natali. Igatsha lalo elikhulu liseMlazi, ekhoneni likaMangosuthu Highway noSolomon Mahlangu Road, kanti elaseKwaDukuza, ebelaziwa ngegama elithi KwaDube, litholakala eMelville, kuWard 14.
Ukuziqamba kabusha kuza nomfanekiso omusha wenkampani ngaphansi kwegama elithi Izwelethu, kanye nesiqubulo esithi “Ikhwalithi. Umphakathi. Ubungcweti.”
Ngemuva kokumenyezelwa kwalolu shintsho, amakhasimende amaningi aphuthume ezinkundleni zokuxhumana ezwakalisa ukujabula nokuncoma leli bhizinisi.
Omunye ubhale wathi: “Imnandi inyama yenu, you’re doing great work. Keep serving the community with quality meats!”
Omunye yena uncome inkonzo etholakala kuwo womabili amagatsha, wathi: “Service yenu tops both sides, Stanger branch & Umlazi. Siyabonga.”
Le mibono ikhombisa ukwethembeka kwamakhasimende kanye nedumela elihle elakhiwe yileli bhizinisi eminyakeni edlule.
Leave a Reply