UMZUKULU KAMHLANGANYELWA
Kuvele ukuhlukana kwemibono ezinkundleni zokuxhumana ngemuva kokuthi umfundi wezindaba zesiXhosa kuNewsroom Afrika, uLisakhanya Pepe, ebhale umlayezo obonakala ubhekiswe kumuntu owake wambukela phansi ngesikhathi esafunda esikoleni samabanga aphezulu.
Lo mfundi wezindaba odumile, osezakhele igama emkhakheni wezokusakaza, uveze ukuthi uyamangala ukubizwa ngo “Tshomi” ngabantu abangakaze babe abangani bakhe, ikakhulukazi umuntu wesifazane athi wayemzonda futhi emdelela esikoleni.
Ebhala ezinkundleni zokuxhumana, uPepe uthe:
“Imagine being called Tshomi on these socials by a Woman who hated you in High school.”
Uqhube wathi igama elithi “Tshomi” selilahlekelwe isithunzi salo ngenxa yokuthi selisetshenziswa kuwo wonke umuntu, ngisho nasezitolo abantu sebebizana ngo “Chomi” noma bengazani.
Kodwa okudonse amehlo kakhulu akukhona ukukhononda kwakhe ngaleli gama kuphela, kodwa yisimo sokuthi umuntu athi wayemzonda kakhulu ngesikhathi besafunda manje usembiza ngo “Tshomi” kuFacebook, ngesikhathi yena esengomunye wobuso obaziwayo kuNewsroom Afrika.
UPepe uphinde wanikeza umongo wokuthi wake waphikisana nabantu abathi ukubizana ngo “Tshomi” kuyinto ejwayelekile eKapa.
Uthe omunye wesifazane wake wamtshela ukuthi abantu abafana naye bazenza abangcono kunabanye futhi ngeke balunge eKapa ngoba le ndlela yokukhuluma ijwayelekile khona.
Nokho uthe wayengaphikisani nokuthi leli gama lijwayelekile, kodwa wagcizelela ukuthi ukujwayeleka kwento akusho ukuthi ilungile.
Nakuba uPepe engadalulanga igama lalowo wesifazane, umbhalo wakhe ususe ingxoxo enkulu mayelana nobuzenzisi, ukuguquka kwabantu uma umuntu esedume, kanye nokuthi impumelelo ivame ukushintsha indlela abantu ababheka ngayo umuntu ababekade bembukela phansi.
Leave a Reply