Umsakazi wohlelo iMorning Live, uLeanne Manas, usephumele obala ephika imibiko ethi useyekile ukusebenza kwa-SABC, waqinisekisa ukuthi uzobuyela ezikrinini ngemuva kwekhefu lesonto lonke.
UManas ukhulume ngalolu daba esitatimendeni asikhiphe esidlangalaleni, ecacisa ukuthi imibiko ethi usemukile ku-SABC ayilona iqiniso.
“Angisulanga neze ku-SABC!” kusho uManas, eveza ukuthi uzobuyela ezikrinini namuhla ngemuva kokuthatha ikhefu lesonto lonke.
Lo msakazi uphinde waxwayisa abalandeli bakhe ngama-akhawunti omgunyathi enkundleni yezokuxhumana iTikTok, asebenzisa igama lakhe.
UManas uthe akakaze athumele lutho kuTikTok, wathi ama-akhawunti azenza yena awawona awangempela.
La mahemuhemu aqhamuke ngesikhathi kusabalala imibuzo ngekusasa lakhe kulo msakazi womphakathi, lapho esengubuso obujwayelekile ohlelweni lwezindaba lwasekuseni iMorning Live.
UManas usenesikhathi eside esebenza kwezokusakaza izindaba, waze wazakhela udumo phakathi kwababukeli baseNingizimu Afrika.
Ngesikhathi amahlebezi okwesula kwakhe esabalele, lo msakazi akazange aveze ukuthi uhlela ukushiya i-SABC. Kunalokho, uqinisekise ababukeli ukuthi uzobuyela ohlelweni ngemuva kwekhefu lakhe.
Uphinde waveza ukuthi uzokwabelana nabalandeli ngezithombe ezinhle azithathe ngesikhathi ehambele indawo ethile eyophumula.
Leave a Reply