UMZUKULU KAMHLANGANYELWA
Umdlalo kamabonakude odume kakhulu ku-e.tv, iHouse of Zwide, usuzofinyelela esiphethweni ngemuva kweminyaka eminingana ujabulisa futhi uheha izigidi zababukeli eNingizimu Afrika.
Lokhu kulandela umlayezo oshicilelwe ezinkundleni zokuxhumana zalo mdlalo othi: “Sonke isiphetho sisho ukuqala kwento entsha. Siyabonga ngezinkumbulo ezinhle. #HouseOfZwide ❤️ Last stitch 26th June.”
Lo myalezo usudale ukuqagela okukhulu kubalandeli balo mdlalo ngokuthi yini ezothatha indawo yawo.
Umsakazo News Network ungakuqinisekisa ukuthi iHouse of Zwide izothathelwa indawo umdlalo omusha wethelevishini obizwa nge-eGagasini, ozoshuthelwa eMlazi, owaziwa njengelokishi lesibili ngobukhulu eNingizimu Afrika.
Lesi simemezelo senziwe ngu-David Mokwevho, oyiNhloko Yezokukhiqiza kwa-Stained Glass TV, ngesikhathi senkulumo-mpikiswano ebibanjelwe emcimbini we-Africa’s Travel Indaba eThekwini.
Ngokusho kukaMokwevho, umdlalo eGagasini kulindeleke ukuthi uveze uhlangothi olusha noluhlukile lwaseMlazi, ugqamise amasiko acebile, umoya wobumbano emphakathini, amabhizinisi endawo kanye nezindaba ezingakaze zixoxwe kabanzi.
Lo mdlalo kulindeleke ukuthi uguqule indlela abantu abacabanga futhi ababuka ngayo uMlazi.
Ochwepheshe embonini yezokungcebeleka bakholelwa ukuthi lo mdlalo ungavula amathuba amasha kubalingisi, abakhiqizi bamafilimu, osomabhizinisi bendawo kanye nasemkhakheni wezokuvakasha eMlazi naseThekwini jikelele.
Yize imininingwane egcwele mayelana nabalingisi, indaba kanye nosuku lokuqala ukusakazwa kwalo mdlalo ingakamenyezelwa, sekukhona isasasa elikhulu phakathi kwabalandeli bethelevishini abafuna ukubona ukuthi eGagasini izowuqhubekisela kanjani phambili umkhondo oshiywe yi-House of Zwide.
Isiqephu sokugcina se-House of Zwide kulindeleke ukuthi sisakazwe mhla zingama-26 kuNhlangulana, okuphawula ukuphela kwesahluko esibalulekile emlandweni wethelevishini yaseNingizimu Afrika kanye nokuqala kohambo olusha lwe-eGagasini.
Leave a Reply